रेसोनियाद्वारे उभारला जाणारा खावडा-ते-महाराष्ट्र वीज प्रसारण मार्ग देशाच्या ऊर्जा सुरक्षेसाठी महत्त्वाचा टप्पा
पालघर : गुजरातमधील कच्छच्या रणभागात उभारला जात असलेला खावडा अक्षय ऊर्जा प्रकल्प आणि त्याला महाराष्ट्राशी जोडणारा खावडा-ते-महाराष्ट्र IV-C पॉवर ट्रान्समिशन प्रकल्प हा देशाच्या ऊर्जा सुरक्षेला बळकटी देणारा महत्त्वपूर्ण उपक्रम ठरत आहे. रेसोनिया लिमिटेडच्या माध्यमातून विकसित होत असलेल्या या प्रकल्पामुळे अक्षय ऊर्जेचा पुरवठा राष्ट्रीय वीज ग्रीडमार्फत अधिक कार्यक्षम आणि विश्वासार्ह पद्धतीने देशभर पोहोचविणे शक्य होणार आहे.
या प्रकल्पांतर्गत उच्चदाब वीजवाहिन्या, ट्रान्समिशन टॉवर्स आणि अन्य आवश्यक पायाभूत सुविधा उभारल्या जात आहेत. खावडा येथे निर्माण होणारी वीज राष्ट्रीय ग्रीडशी जोडून विविध राज्यांपर्यंत पोहोचविण्याची महत्त्वाची जबाबदारी ही प्रसारण यंत्रणा पार पाडणार आहे. ऊर्जा निर्मितीइतकेच तिचे सुरक्षित आणि अखंड प्रसारण महत्त्वाचे असल्याने हा प्रकल्प ऊर्जा क्षेत्राचा कणा मानल्या जाणाऱ्या ट्रान्समिशन नेटवर्कला अधिक बळकटी देणार आहे.
खावडा IV-C प्रकल्पाद्वारे सुमारे ७ गिगावॅट अतिरिक्त वीज राष्ट्रीय ग्रीडमध्ये समाविष्ट करण्याची क्षमता निर्माण होणार आहे. त्यामुळे मुंबई महानगर प्रदेश, पुणे तसेच महाराष्ट्रातील औद्योगिक आणि नागरी भागांमधील वाढत्या वीज मागणीची पूर्तता करण्यास मदत मिळणार आहे. ऊर्जा निर्मिती केंद्रे आणि वापर केंद्रांमधील अंतर भरून काढण्यात हा प्रकल्प महत्त्वाची भूमिका बजावणार आहे.
भारताने २०३० पर्यंत ५०० गिगावॅट बिगर-जीवाश्म इंधनाधारित ऊर्जा क्षमता निर्माण करण्याचे उद्दिष्ट ठेवले आहे. हे लक्ष्य साध्य करण्यासाठी सक्षम प्रसारण व्यवस्था उभारणे आवश्यक असून खावडा IV-C प्रकल्प त्यासाठी महत्त्वाचा मानला जात आहे.
रेसोनियाचे व्हाईस प्रेसिडेंट नितान पितळे यांनी सांगितले की, मजबूत ट्रान्समिशन नेटवर्क हे ऊर्जा क्षेत्राचे आधारस्तंभ आहे. हा प्रकल्प ऊर्जा निर्मिती केंद्रे आणि ग्राहक यांच्यातील दुवा अधिक मजबूत करेल. तसेच पर्यावरणीय जबाबदारी जपत शाश्वत विकासाच्या तत्त्वांनुसार प्रकल्पाची अंमलबजावणी केली जात आहे.
स्थानिक समुदायांशी समन्वय, रोजगारनिर्मिती, कौशल्य विकास आणि पर्यावरण संवर्धनाला प्राधान्य देत राबविण्यात येणारा हा प्रकल्प केवळ वीज प्रसारणापुरता मर्यादित नसून ग्रामीण विकासालाही चालना देणारा ठरत आहे. देशाच्या वाढत्या ऊर्जा गरजा पूर्ण करण्यासाठी आणि भविष्यातील ऊर्जा संक्रमणाला गती देण्यासाठी हा प्रकल्प महत्त्वाची भूमिका बजावणार असल्याचा विश्वास व्यक्त केला जात आहे.
