माजी खासदार विनायक राऊत यांच्या निवासस्थानी अखंड भजनसेवेने गणेशोत्सवाला सांस्कृतिक रंग
मालवण : गणेशोत्सवाच्या निमित्ताने तळगाव येथे भक्ती, संगीत आणि सांस्कृतिक परंपरेचा अनोखा संगम अनुभवायला मिळत आहे. शिवसेनेचे माजी खासदार तथा शिवसेना सचिव विनायक राऊत यांच्या तळगाव येथील निवासस्थानी श्री गणरायासमोर सुरू असलेल्या भजन महोत्सवात महाराष्ट्राच्या विविध भागांतील नामवंत भजनी कलाकार सहभागी होत असून, त्यांच्या स्वरांनी परिसर भक्तिरसात न्हाऊन निघत आहे.
राऊत यांच्या निवासस्थानी गेल्या अनेक वर्षांपासून गणेशोत्सव काळात भजनसेवेची ही परंपरा अखंडपणे सुरू आहे. यंदाही दररोज दुपारी १२ वाजल्यापासून रात्री साडेदोन वाजेपर्यंत विविध भजनी मंडळे आणि गायकांकडून गणरायाच्या चरणी भजनसेवा अर्पण केली जात आहे. त्यामुळे तळगाव येथे दिवसभर भाविकांची वर्दळ आणि रात्री उशिरापर्यंत भक्तिमय वातावरण पाहायला मिळत आहे.
सोमवारी मुंबई येथील श्री स्वामी समर्थ भजन मंडळाचे सुप्रसिद्ध भजन गायक बुवा सुशील गोठणकर यांनी आपल्या वैशिष्ट्यपूर्ण शैलीत भजनसेवा सादर केली. त्यांच्या दमदार आणि सुरेल गायनाने उपस्थित भाविक मंत्रमुग्ध झाले. पारंपरिक भजनातील भाव, शब्दांची ताकद आणि सुरांची रंगत यामुळे कार्यक्रमाला विशेष रंगत आली.
भजनसेवा संपल्यानंतर विनायक राऊत यांच्या हस्ते बुवा सुशील गोठणकर यांचा सन्मान करण्यात आला. यावेळी उपस्थित भाविकांनीही गोठणकर यांच्या भजनसेवेचे कौतुक केले.
विशेष म्हणजे विनायक राऊत यांनाही भजनाची विशेष आवड असून ते स्वतः हार्मोनियम वाजवत भजनसेवेत सहभागी होत असल्याचे यापूर्वीही वृत्त आले आहे. त्यांच्या निवासस्थानी गणेशोत्सवात मोठ्या संख्येने भजनी कलाकार सहभागी होण्याची परंपरा गेल्या अनेक वर्षांपासून सुरू आहे.
