पालघर : बोईसर येथील ‘विराज’ स्टील मॅन्युफॅक्चरिंग कंपनीसंदर्भातील जनसुनावणी बुधवारी संमिश्र वातावरणात पार पडली. या सुनावणीत प्रकल्पाच्या समर्थनासोबतच काही ठिकाणी विरोधाचे सूर उमटल्याने चर्चा सखोल आणि व्यापक झाली.
सुनावणीदरम्यान काही ग्रामस्थांनी प्रकल्पाबाबत आधी ग्रामसभेत सविस्तर चर्चा व्हावी, अशी मागणी केली. तसेच सुनावणीचे ठिकाण अधिक सोयीस्कर असावे, अशी अपेक्षाही व्यक्त करण्यात आली. पर्यावरणाच्या दृष्टीने नदी आणि नैसर्गिक जलस्रोतांचे संरक्षण अत्यंत महत्त्वाचे असल्याने कंपनीने याबाबत ठोस उपाययोजना कराव्यात, अशा सूचना ग्रामस्थांकडून मांडण्यात आल्या.
दुसरीकडे, या प्रकल्पामुळे स्थानिक युवकांना रोजगाराच्या संधी उपलब्ध होतील तसेच परिसराच्या आर्थिक विकासाला चालना मिळेल, असा सकारात्मक दृष्टिकोन कंपनीच्या अधिकाऱ्यांनी व्यक्त केला. त्यामुळे प्रकल्पाबाबत ग्रामस्थांमध्ये समर्थन आणि विरोध अशी दोन्ही मते स्पष्टपणे समोर आली.
या जनसुनावणीत साधारण, मान, वारंगडे, बारीपाडा, सुतारपाडा आणि गुंदले या गावांमधील सुमारे ३०० ते ४०० ग्रामस्थ उपस्थित होते. अनेकांनी आपले मत मांडत काही आक्षेपही नोंदवले. यावर उत्तर देताना संबंधित सरकारी अधिकाऱ्यांनी सर्व कायदेशीर प्रक्रिया पूर्ण करूनच ही सुनावणी पार पडत असल्याचे स्पष्ट केले.दरम्यान, स्थानिक लोकप्रतिनिधींनी आणि ग्रामस्थांनी आपले मत नोंदवत प्रकल्पाला विरोध असल्याचे स्पष्टपणे सांगितले.
सुनावणीच्या शेवटी सर्व उपस्थितांचे आभार मानून अधिकाऱ्यांनी प्रक्रिया पूर्ण झाल्याची घोषणा केली. एकूणच, या जनसुनावणीमुळे प्रकल्पाबाबत विविध बाजूंनी चर्चा होऊन पुढील निर्णय प्रक्रियेसाठी महत्त्वपूर्ण दिशा मिळाल्याचे दिसून आले.
