१७ पैकी १३ मते मिळवत प्रतिस्पर्धी कुणाल नारले यांचा पराभव; ग्रामस्थांकडून अभिनंदन
पालघर : माहीम ग्रामपंचायतीच्या उपसरपंचपदाच्या निवडणुकीत उद्धव बाळासाहेब ठाकरे गटाचे ग्रामपंचायत सदस्य मुकेश दत्ताराम करबट यांची बहुमताने निवड झाली. मंगळवार, ११ ऑगस्ट २०२६ रोजी झालेल्या या निवडणुकीत करबट यांना १३ मते, तर प्रतिस्पर्धी कुणाल नारले यांना ४ मते मिळाली. एक मत बाद झाले.
नोव्हेंबर २०२३ मध्ये झालेल्या माहीम ग्रामपंचायत निवडणुकीत प्रीती अरुण पाटील यांची सरपंचपदी, तर नरोत्तम राऊत यांची उपसरपंचपदी निवड झाली होती. ठरलेल्या अडीच वर्षांच्या कार्यकाळानंतर राऊत यांनी उपसरपंचपदाचा राजीनामा दिल्याने रिक्त झालेल्या पदासाठी ही निवडणूक घेण्यात आली.
निवडीनंतर नवनिर्वाचित उपसरपंच मुकेश करबट यांनी गावाच्या सर्वांगीण विकासासाठी काम करण्याचा निर्धार व्यक्त केला. “मी आदिवासी समाजाचा प्रतिनिधी असलो तरी माझी जबाबदारी संपूर्ण माहीम गावाप्रती आहे. सर्व समाजघटकांना सोबत घेऊन गावाच्या विकासासाठी सर्वतोपरी प्रयत्न करेन,” असे त्यांनी सांगितले.
कुणाल नारले यांच्या सहभागामुळे निवडणूक प्रक्रिया लोकशाही पद्धतीने पार पडली. उपसरपंचपदी निवड झाल्यानंतर मुकेश करबट यांचे ग्रामस्थ, समर्थक आणि कार्यकर्त्यांकडून अभिनंदन करण्यात येत आहे.
