🏆 जिजाऊ नगरीत रंगला कुस्तीचा थरार! 🏆 महाराष्ट्र केसरी पृथ्वीराज मोहोळचा दमदार विजय; राज्यस्तरीय चितपट स्पर्धेत भारत मदनेला चित करत पटकावली मानाची गदा

विक्रमगड, दि. १८ : विक्रमगड तालुक्यातील झडपोली येथील जिजाऊ नगरीत आयोजित राज्यस्तरीय चितपट कुस्ती स्पर्धेत २०२५ चा महाराष्ट्र केसरी पृथ्वीराज मोहोळ याने अतिशय रंगतदार आणि तासभर चाललेल्या अटीतटीच्या लढतीत हिंद केसरी भारत मदने याला चित करत प्रथम क्रमांक पटकावला. या विजयानिशी मोहोळ याने १ लाख रुपयांचे रोख बक्षीस आणि मानाची गदा आपल्या नावावर केली.

या स्पर्धेत भारत मदने यांना द्वितीय क्रमांकावर समाधान मानावे लागले, तर संग्राम काकडे याने तृतीय क्रमांक मिळवला. हजारो कुस्तीप्रेमींच्या साक्षीने रंगलेल्या या सोहळ्याला २०२६ चे महाराष्ट्र केसरी हर्षद सदगीर यांची प्रमुख उपस्थिती लाभली, ज्यामुळे मैदानात उत्साहाचे वातावरण निर्माण झाले होते.

जिजाऊ शैक्षणिक व सामाजिक संस्थेचे संस्थापक निलेश सांबरे यांच्या ५० व्या सुवर्ण महोत्सवी वाढदिवसानिमित्त जिजाऊ संघटनेतर्फे विविध क्रीडा स्पर्धांचे आयोजन करण्यात आले आहे. शुक्रवारी रात्री पार पडलेल्या या कुस्ती स्पर्धेत राज्यभरातील ४०० हून अधिक कुस्तीपटूंनी सहभाग नोंदवला.महाराष्ट्राच्या मातीतल्या अस्सल रांगड्या खेळाचा आनंद घेण्यासाठी कुस्तीप्रेमींनी मोठी गर्दी केली होती. मल्लांचा उत्साहही तितकाच ओसंडून वाहत होता.

यासोबतच राज्यस्तरीय कबड्डी स्पर्धेत १२ संघ सहभागी झाले असून रविवारी होणाऱ्या जिल्हास्तरीय कबड्डी स्पर्धेत ६० संघ सहभागी होणार आहेत, ज्यात ८ मुलींच्या संघांचा समावेश आहे. तसेच राज्यस्तरीय व्हॉलीबॉल स्पर्धाही रंगणार आहे.

या सर्व स्पर्धांमध्ये सहभागी होणाऱ्या खेळाडूंवर ५० लाख रुपयांहून अधिक बक्षिसांची खैरात करण्यात येणार आहे.

“विक्रमगडसारख्या ग्रामीण भागात इतक्या भव्य स्पर्धांचे आयोजन होणे ही अभिमानाची बाब आहे. हा विजय माझ्यासाठी विशेष आहे,” अशी प्रतिक्रिया विजेता पृथ्वीराज मोहोळ यांनी दिली. तर “ग्रामीण भागातील खेळाडूंना हक्काचे व्यासपीठ मिळावे आणि त्यांनी जागतिक स्तरावर महाराष्ट्राचे नाव उज्ज्वल करावे, हेच आमचे स्वप्न आहे,” असे मत निलेश सांबरे यांनी व्यक्त केले.

मोफत शिक्षण, आरोग्य सेवा, पोलीस व स्पर्धा परीक्षा प्रशिक्षण आणि महिला सक्षमीकरण यांसारखे उपक्रम राबवणारी जिजाऊ संस्था आता क्रीडा क्षेत्रातही राज्यभरात आपली छाप पाडत आहे.