🩺“आरोग्यसंपन्न पालघर घडवण्यासाठी लोकसहभाग आवश्यक” : सीईओ मनोज रानडे 🩺

🩺जिल्हा परिषद पालघर, दिनांक 13 एप्रिल 2026 : राज तंत्र वृत्तसेवा

“मुख्यमंत्री समृद्ध पंचायत राज अभियानासोबतच ‘माझं गाव, आरोग्यसंपन्न गाव’ ही मोहीमही तितक्याच जोमाने राबवून आरोग्यसंपन्न पालघर जिल्हा घडवूया,” असे आवाहन मुख्य कार्यकारी अधिकारी मनोज रानडे यांनी केले. जिल्हा परिषद पालघरच्या आरोग्य विभागामार्फत आयोजित जिल्हास्तरीय कार्यशाळेत ते अध्यक्षस्थानावरून बोलत होते.या कार्यशाळेत ‘माझं गाव, आरोग्यसंपन्न गाव’ या महत्त्वाकांक्षी अभियानाची सविस्तर माहिती देण्यात आली. हे अभियान १ एप्रिल २०२६ ते ३१ मार्च २०२७ या कालावधीत राबविण्यात येणार असून, गावांच्या कामगिरीचे मूल्यांकन करून ७० टक्क्यांपेक्षा अधिक गुण मिळविणाऱ्या गावांना ‘आरोग्यसंपन्न गाव’ म्हणून घोषित करण्यात येणार आहे. राज्यस्तरावर उत्कृष्ट कामगिरी करणाऱ्या जिल्ह्यांना प्रथम, द्वितीय व तृतीय क्रमांकासाठी अनुक्रमे ५, ३ व २ कोटी रुपयांची पारितोषिके देण्यात येणार आहेत.मनोज रानडे यांनी यावेळी सांगितले की, आरोग्याच्या क्षेत्रात यश मिळवण्यासाठी लोकसहभाग अत्यंत महत्त्वाचा आहे. प्रत्येक गावाने स्वतःची जबाबदारी ओळखून स्वच्छता, आरोग्य जागरूकता आणि प्रतिबंधात्मक उपाययोजना यावर भर दिल्यास संपूर्ण जिल्हा सक्षम होऊ शकतो.कार्यक्रमाच्या प्रारंभी जिल्हा आरोग्य अधिकारी डॉ. संतोष चौधरी यांनी प्रास्ताविक सादर करत अभियानाची उद्दिष्टे स्पष्ट केली. त्यांनी माता व बालमृत्यू दर कमी करण्यासाठी जनजागृती आणि सामाजिक सहभाग आवश्यक असल्याचे अधोरेखित केले. जिल्हा शल्यचिकित्सक डॉ. रामदास मराड यांनी गुणवत्तापूर्ण आरोग्यसेवेबाबत यंत्रणा कटिबद्ध असल्याचे सांगितले, तर व्यंकटराव हुंडेकर यांनी महिला व बालविकास विभागाच्या सक्रिय सहभागाची ग्वाही दिली.या कार्यशाळेस विविध तालुक्यांतील सरपंच, आशा स्वयंसेविका, समुदाय आरोग्य अधिकारी, ग्रामसेवक आणि वैद्यकीय अधिकारी उपस्थित होते. उपस्थितांनीही अभियानासाठी सक्रिय सहभाग दर्शविला. ‘आरोग्यसंपन्न पालघर’ हे उद्दिष्ट साध्य करण्यासाठी प्रशासन व नागरिकांचा समन्वय अत्यावश्यक असल्याचे यावेळी स्पष्ट करण्यात आले.